एकाएक कसरी उल्टियो मधेशी मोर्चाको निर्णय, सप्तरीको घटनाको रात भारतीय राजदूतले के गरे ?

काठमाडौं, २६ फागुन । सप्तरी घटनापछि जसरी नेपाली राजनीति तरंगित भएको छ, त्यसैगरी भारतीय दूतावास पनि एकाएक सक्रिय भएको छ । भारतीय राजदूत रन्जीत रे कार्यकाल सकेर फिर्ता भइसके पनि निमित्त राजदूत विनय कुमारका कारण मधेशी मोर्चाको एउटा निर्णय उल्टिएको खुलासा भएको छ । निमित्त राजदूत विनय कुमारकै दबाबमा मधेसी मोर्चाले सरकारबाट समर्थन लिन नसकेको खुलासा भएको हो । नेकपा एमालेको मेची महाकाली–अभियान बिथोल्ने क्रममा फागुन २३ गते सप्तरीमा प्रहरीको गोली लागि ३ जनाको मृत्यु भएपछि सोही दिन साँझ काठमाडौँमा मधेशी मोर्चाको आकस्मिक बैठक बस्यो । हतारहतारमा बसेको बैठकले सरकारबाट समर्थन फिर्ता लिने निर्णय गर्यो । तर, एकैछिनमा त्यो निर्णय फेर्दै विज्ञप्ति जारी गरियो । सरकारबाट समर्थन फिर्ता लिने निर्णय एकाएक ‘गायव’ पारियो । मोर्चाका प्रवक्ता मनिष सुमनले समेत समर्थन फिर्ता लिने निर्णय भएको र फागुन २४ गते औपचारिक रुपमा सरकार र संसदमा जानकारी गराउने निर्णय गरेको जानकारी संचारकर्मीलाई दिए । तर, एकछिनअगाडि सरकारबाट समर्थन लिएको मोर्चाले विज्ञप्तिमा त्यो कुरा उल्लेख नभएपछि सञ्चारकर्मी समेत आश्चर्यमा परे । हतार–हतार समाचार सच्याइयो । कारण– मधेशी मोर्चा आफ्नो निर्णयमा केही मिनेट पनि टिक्न सकेन् ।

नाम उल्लेख नगर्ने शर्तमा मोर्चाका एक जना नेताले दैनिक नेपालसँग भने- भारतीय दूतावासबाट निमित्त राजदूत विनय कुमारले फोन गरी तत्काल निर्णय सच्चाउन दबाब दिए । भोलि फेरि बसेर निर्णय गर्ने भनेर नेताहरु उठे । सोही बमोजिम मधेशी नेताहरुले ‘फेस सेभिङ’ गरे । सरकारबाट हटने निर्णय गरेको मोर्चाले शर्त राख्दै एकहप्ताको अल्टिमेटम दियो । मोर्चाले भारतले के भन्यो ? घटनाको भोलिपल्ट मंगलबार बसेको मधेसी मोर्चासहितको संघीय गठबन्धनले सरकारबाट समर्थन फिर्ता लिएन, एक हप्ताको अल्टिमेटम मात्र दियो । त्यो शर्त थियो– ७ दिनभित्र संविधान संशोधन गर्नुपर्ने र निर्वाचन स्थगित गर्नुपर्ने । पहिला समर्थन फिर्ता लिएको, पछि निर्णय गायब पारिएको र भोलिपल्ट सरकारलाई ७ दिने अल्टिमेटम दिने गरी मधेसवादी दलको फरक फरक निर्णय आउनुका पछाडि भारत थियो ।किनकी अघिल्लो रात धेरै कुरा पाकिसकेको थियो । सरकारबाट समर्थन फिर्ता लिएपछि ‘बाग्रेनिङ पावर’ घट्ने भएकाले तत्काल अन्य निर्णय गर्न भारतीय निमित्त राजदूतले सुझाव दिएको मोर्चाका एक नेताले बताए । भारतीय दूतावासले भने अनुसार गर्ने कि नगर्ने भन्नेमा पनि मोर्चाभित्र चर्को विवाद देखियो । संघीय समाजवादीका अध्यक्ष उपेन्द्र यादव भारतीय प्रस्तावको विपक्षमा उभिए । यादवले असहमति जनाएपछि मोर्चाका प्रभावशाली नेता महन्थ ठाकुरको दबाबमा सरकारलाई देखावटी रुपमा ७ दिनको अन्टिमेटम दिइएको स्रोतको दाबी छ । भारतीय दूतावासको खेलले प्रचण्ड सरकार भीरको डिलैमा पुगेर पनि टिक्न त सफल भयो । तर, सप्तरी घटनापछि मधेशी मोर्चा र सरकारबीचको दूरी बढेको छ । वर्तमान गठबन्धन बनाउन निकै ठूलो मेहनत गरेको भारतले यसको विकल्पका विषयमा पनि प्रमुख पार्टीभित्र खेलिरहेको स्रोतको दाबी छ । भारतीय दूतावासका कर्मचारीहरु सरकार, मधेशी दल, काँग्रेस र एमालेका केही नेताहरुसँग दिनहुँजसो अनौपचारिक छलफल गरिरहेको स्रोतको दाबी छ ।

Write Comment Below:

Disclaimer: Please note, this is an online news portal, All of these images/videos found here from 3rd party video/image hosting sites such as YouTube.Com, Vimeo.Com, DailyMotion.Com, Blip.Tv, We do not host any videos and some photos. Please contact to appropriate video/image hosting site for any content removal.